Der Bürgerverein wünscht Ihnen und Euch einen schönen und besinnlichen ersten Advent!
De Lichterkett
ein Gedicht von Doris Müller
Medde Movember jong ich eejelde op de Trierer Stroß,
ävver wat wor me vör de Sparkass los?
Do stong ne Lastwarel met Tanne vör de Dör,
än op eemol wor mich klor: Et weihnachtet at wier.
Vör de Sparkass än vör en Drojerie
hiefte Mannslü de Chresböm en de Hüh.
Lämpcher wode draajebonge,
Weihnachtszitt, du kannst bau komme.
Ich han nu jau de Beng onger de Ärm jenomme,
jetz hat dr Weihnachtsstress bejonne.
Als ich da wor zu Huus,
packde ich als ieschtes de janze Lichterkette uus.
Wat ich vörrich Johr schönn beijeneh en de Kess dong,
ich nu als hoffnungslos verknüddeltes Böndel vörfong.
Su darf ich mich ne janze Daach domet amüsiere,
all die Kette en jruuße än klenge zo sortiere.
Et nu rechtisch spannend weed,
nämlich, ob an all die Kette och jiddes Lämpche aajeht
An die met 200 Kääze draa,
jong je enzijjes aa,
än an die met 40 Stück,
brannte 20 Lämpcher – wat för e Jlöck.
Mäh an de klenkste Kett en mi Sortiment,
jiddes enkel Kääzje brennt.
Nu wore je 200 Lämpcher uus,
wie fengt me do die kappodde eruus?
Ich fong aa uuszeprobiere,
welche kapott än welche noch funktioniere.
Die Lämpcher brenge mich noch öm dr Verstand,
bei meniche han ich mäh noch et Glas ejjen Hank.
Et es för ze frecke,
dä Rest blievt eefach en de Fassung stecke.
Dat Problem lös ich met Fluche än de Zang,
ävver et jeht emmer noch jee Lämpche aa.
Langsam driehn ich dörch met de janze Mess,
än ben am schelde, datt et wier Weihnachte es.
Do sehn ich dat en dr Karton noch de Rechnung litt,
än et op die Kett dreij Johr Jarantie noch jitt.
Ich jau met ming kapodde Kett noh dat Jeschäft,
än die Lämpcher an die Ömjetuschde, die brenne jetz.
Nu die Lämpcher vörsechtisch uus de Verpackung buxiere,
än die Kett dann blus noch drusse an dr Bom drapiere.
Die Kääze erstrahle doraa en aller Pracht,
än alle saare, dat haste fein jemacht.
Bei et niekste Weihnachtsfest da ben ich fott,
dann han ich met die janze Lichterkett nüüß mieh an dr Hott.